1 | 2 | 3 | 4

Un tia ba cabwa sio ma Manzan’uwi sio na. Un tia ba cawara sio ma Do’oro’uwi sio na. A wa Maa Debwenu sanmuso ma babe lahurama, wa afuo ‘uwa wèwa a za’iri’a. O yi ma a zèrè a zèrè, abe nii lo, a bèrio lo nyunso mi se, a lo ‘oo lo verobena.

A din ha’iri de’ereso han vansia dura wa ma sua zèrè nè a li Nuwènu waa wa’ati dimansi nyuniso. Lo wa annu Debwenu a bèri Li Zo wa se. Lo wa a nii nè bo wan a vè Debwenu Maa se. Lo wa Nyunso Yezu mana wa se aa san wa waa, a cian vèra mi Maa se. A be lo henian wa, a wa fue wa wè mian, a wa bèri mi, a han mi ma laare. Bun a lo bwenu deniso tannu. Wa we za’iri’a bun zeremi pèè Nuwènu se. Nupèè nè han lo ma laare, to lo mi ho see wa’ati pèè fwa bin.

Han vansia lo lo Nyunso nyan ma bini bwe, a we mu nyuniso. To ba nè yi zunna lo bèrinu ho diminyan lo bwenu deniso wa’ati, to lobe mite yoo bèri ba mi Maa zun lo bwenu nyuniso zeze. Nuupèè nè pan lo ho diminyan, nuupèè nè bè bèrio lo ho diminyan, to lo dèri pan lo Nyunso ho diminyan nè loo bwemu. Sun bè mana ho hiro ma zèrè pantinle. Zèrè ma hiro vuora wèna. A ho wan-tete nè un bo zèrè ma fue ho hiro wan han ni ; a ho wan-‘oo nè un cina na zèrè ma ti ho hiro wan un waa.

Labe Zuzèfu wo mi danlobe a dèra ho hiro nuu. Duèrè a mu zerema bwiya nyun ma bwè a lo a Père. Lo oronia zafia cururu diminyan bezunle ma Debwenu bezunle wanwan. Zerema be bwemè ma be ‘annawe lo wo zafia cèninuu han la’orila. Dè, Labe Zuzèfu via wa Malitun pèrela nii bwiya nyun ma nii hozin (46) han la’orila. A ba la’urudena, ma ba sèrela ma ba atisira nii bè mana. Lo hanyanmu vasi.

Zèrè, lo Nyunso nyan bini heni mu wa wurena, li zèrè wozomè lahurama, lo wa annu mi. Wa annu mi ba banbannasio, ba mwèntènsio ma ba nii-duduzaa. Wa zun la’urudena tii; wa zun ba nè minian a mi hiro we Debwenu tosèra tii; wa zun Debwenu tosèra tii. Wa yito dè cii. Wa cèzin zèrè, a fue wa wa lo Nyunso na, a bèri lo wa sinle, a lo Nyunso hiro cèzinla wa bena, a bèrila wa mi Maa zun.

Ni’arani a tin loo. Bun bo a vè. Bun we, wabe nè a Debwenu tosèra, wa nyin han wawa be-nyun nè Labe Zuzèfu wa han wa zèrè. Li deniso, lo lo: « O yi te baa, o tere te buu ». Mu ‘ura lo ‘arato arato bè a Père-yamu. ‘Arato ‘arato bè a Sère-yamu. ‘Arato ‘arato bè a fèrè yamu. ‘Arato ‘arato bè a atisi yamu. ‘Arato ‘arato bè a Krecen-yamu. Li wawe nyuniso ca li dioyè hia mwènmwèn, lo : Hinnaloo Moutian lo : « Ba yi co yenu bo o wa a o minian a li fi a, baba o we we li wema ».

Bun we, wa cèzin a wa cè wa hère obra besin l’Abbé Paulin Dembèrè tala li wile so. Wa yito te da.

Nyunso, seni wa a wa zunna o bèrinu wa se li tun he, yirawe a ‘ue muso yoo bèri wa ma sinwènu lo Maa se. Irisi wa mènnèn’èn sènuma na. Amina !

Samaya, le 17 novembre 2017

Abbé Florent KONÉ